ខ្មាន់កាំភ្លើងមួយក្រុមជិះរថយន្តទំនើប បាញ់រះ The Sky Line Tower ផ្អើលទាំងកណ្តាលយប់

ភ្នំពេញ៖ ជនសង្ស័យមួយក្រុមជិះរថយន្ដស៊េរីទំនើប៣គ្រឿង បានដក់កាំភ្លើងបាញ់រះអគារ The Sky Line Tower ប្រម៉ាណជាង១០គ្រាប់ រួចនាំគ្នាបើកគេចខ្លួនអស់ ដោយមិនទាន់ដឹងពីមូលហេតុនោះឡើយ។

ករណីបាញ់រះជាច្រើនគ្រាប់នេះ បានកើតឡើងកាលពីវេលាម៉ោង២និង៤០នាទីរំលងអាធ្រាត្រ ឈានចូលថ្ងៃទី២០ ខែតុលា ឆ្នាំ២០២២ ស្ថិតតាមបណ្ដោយផ្លូវលេខ១៣៤ សង្កាត់វាលវង់ ខណ្ឌ៧មករា រាជធានីភ្នំពេញ។

បើតាមអ្នកឃើញហេតុការណ៍បានឲ្យដឹងថា ក្រុមជនសង្ស័យដែលបាញ់រះជាច្រើនគ្រាប់នោះជិះរថយន្ដម៉ាក ALPARD ពណ៌ខ្មៅ២គ្រឿង និងរថយន្ដម៉ាក FORD ពណ៌ស មួយគ្រឿង តែមិនចាំស្លាកលេខនោះទេ ដោយក្រោយពីផ្ទុះអាវុធរួច ពួកគេក៏បើករថយន្ដគេចខ្លួនចេញពីកន្លែងកើតហេតុភ្លាមៗតែម្ដង។

ក្រោយពេលកើតហេតុ សមត្ថកិច្ចមូលដ្ឋាន និងសមត្ថកិច្ចជំនាញ បានចុះដល់កន្លែងកើតហេតុដើម្បីស្រាវជ្រាវ និងកំណត់មុខសញ្ញាដែលប្រើប្រាស់អាវុធខុសច្បាប់យកមកផ្ដន្ទាទោសតាមច្បាប់៕