បាញ់តដៃជាមួយសមត្ថកិច្ចមិនខ្លាចញញើតធ្វើឱ្យមន្ត្រីនគរបាល២នាក់ ស្លាប់គួរសង្វេកណាស់

(កណ្តាល)៖ មានការភ្ញាក់ផ្អើលខ្លាំងនៅមុននេះបន្តិច ខណៈប្រភពព័ត៌មានបឋម បានឲ្យដឹងថា មុននេះ គឺមានករណីសមត្ថកិច្ចចុះបង្ក្រាបគ្រឿងញៀន ហើយត្រូវបានមុខសញ្ញាគ្រឿងញៀននោះ បាញ់ទៅលើមន្ត្រីនគរបាលប៉ុស្តិ៍ទួលព្រិចម្នាក់ និងមន្ត្រីផ្នែកបង្ក្រាបគ្រឿងញៀន ស្រុកអង្គស្នូល ម្នាក់ បណ្តាលឲ្យស្លាប់ភ្លាមៗយ៉ាងរន្ធត់តែម្តង ។ ហេតុការណ៍នេះបានកើតឡើងនៅថ្ងៃទី២១ ខែមេសា ឆ្នាំ២០២២នេះ ក្នុងឃុំទួលព្រិច ស្រុកអង្គស្នួល ខេត្តកណ្តាល ។

ឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាក់នៅរសៀលថ្ងៃទី២១ ខែមេសា ឆ្នាំ២០២២នេះថា នៅក្នុងប្រតិបត្តិការបង្ក្រាបបទល្មើសគ្រឿងញៀន នៅស្រុកអង្គស្នូល ខេត្តកណ្តាល មន្រ្តីនគរបាលរបស់លោកចំនួន២រូប បានស្លាប់ដោយសារក្រុមជនល្មើសបាញ់ត្រូវ ។ ដោយឡែកខ្មាន់កាំភ្លើង ក៏ត្រូវសមត្ថកិច្ចចាប់ខ្លួនបានដែរ។

ឧត្តមសេនីយ៍ទោ ឈឿន សុចិត្ត បានបញ្ជាក់ថា មន្ត្រីនគរបាលដែលរងគ្រោះរហូតបាត់បង់ជីវិតនោះរួមមាន៖
*ទី១៖ ឈ្មោះ ជុច សភា ជានាយនគរបាលប៉ុស្តិ៍ឃុំទួលព្រិច ស្រុកអង្គស្នូល
*ទី២៖ ឈ្មោះ រឹម សុផាន់ណា មានតួនាទីរងផ្នែកគ្រឿងញៀន ស្រុកអង្គស្នូល។

បើតាមលោកឧត្តមសេនីយ៍ស្នងការ មុខសញ្ញាគ្រឿងញៀនដែលជាជនដៃដល់ និងបក្ខពួកមួយចំនួន ក្នុងចំណោម៥នាក់ ត្រូវបានកម្លាំងនគរបាលបង្ក្រាបបានភ្លាមៗផងដែរ។ ទោះបីជាយ៉ាងណាបក្សជនសង្ស័យនិងខ្មាង់កាំំភ្លើង មិនត្រូវបានសមត្ថកិច្ចធ្វើការទម្លាយនូវអត្តសញ្ញាណនៅឡើយ ហើយករណីបង្ក្រាបគ្រឿងញៀនពិតជារឿងគួរសង្វេកដែលបានបាត់មន្ត្រីប៉ូលីសពីរ ធ្វើប្រទេសជាតិនិងក្រុមគ្រួសារបាត់បង់មនុស្សល្អជាទីស្រលាញ់ ហើយជាពិសេសនោះ ប្រពន្ធនិងកូនៗត្រូវកំព្រា ដោយសារតែជនល្មើស។

ជាមួយគ្នានោះ មហាជនក៏សរសើរដល់សមត្ថកិច្ចខេត្តកណ្តាលមានសមត្ថភាព ក្នុងបង្ក្រាបជនល្មើសបានភ្លាមៗ និងសូមចូលរួមរំលែកទុក្ខ ដល់ក្រុមគ្រួសារនៃសព មន្ត្រីនគរបាលដែលរងគ្រោះរហូតបាត់បង់ជីវិតលោក ជុច សភា ជានាយនគរបាលប៉ុស្តិ៍ឃុំទួលព្រិច ស្រុកអង្គស្នូល និងលោក រឹម សុផាន់ណា មានតួនាទីរងផ្នែកគ្រឿងញៀន ស្រុកអង្គស្នូល៕

របាយការណ៍ សមត្ថកិច្ច