មនុស្សមិនតិចឡើយគឺជាង១ពាន់នាក់ចូលរួមរត់ប្រណាំងអបអរព្រឹត្តិការណ៍ Asian Games Hangzhou 2022 ក្នុងទីក្រុងភ្នំពេញ

ភ្នំពេញ៖ ព្រឹត្តិការណ៍រត់ប្រណាំងលក្ខណៈសប្បាយៗដែលមានឈ្មោះថា OCA Fun Run នឹងចាប់ផ្ដើមដំណើរការនៅព្រឹកថ្ងៃទី ០២ ខែតុលា ឆ្នាំ២០២២ ស្អែកនេះនៅជុំវិញតំបន់សណ្ឋាគារសុខារ៉េស៊ីដង់ ដែលមានមហាជនចំរុះជាតិសាសន៍ជាង១០០០នាក់ចូលរួមរត់កម្សាន្តដើម្បីអបអរសាទរដំណើរឆ្ពោះទៅព្រឹត្តិការណ៍ 19th Asian Games Hangzhou 2022 នៅប្រទេសចិន និងមហាសន្និបាតក្រុមប្រឹក្សាកីឡាអូឡាំពិកអាស៊ី លើកទី៤១ ដែលកម្ពុជាធ្វើម្ចាស់ផ្ទះ ចាប់ពីថ្ងៃទី០១ ដល់ថ្ងៃទី០៥ ខែតុលា ឆ្នាំ២០២២។

អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោកវ៉ាត់ ចំរើនបានមានប្រសាសន៍កាលពីរសៀលថ្ងៃទី ១ខែតុលានេះថា៖ នាថ្ងៃស្អែកនេះនឹងមានការចូលរួមរត់ពីសំណាក់ភ្ញៀវជាតិនិង អន្តរជាតិជាង១០០០នាក់ ក្នុងនោះក៍មានការចូលរួមរត់កម្សាន្តពីមន្ដ្រីជាន់ខ្ពស់ OCA និងតំណាងគណៈកម្មការរៀបចំព្រឹត្តិការណ៍ 19th Asian Games Hangzhou 2022 ក៍ដូចជាប្រតិភូកីឡាធំៗជាង៧០នាក់មកពី៥០ប្រទេសដែលចូលរួមក្នុងមហាសន្និបាតក្រុមប្រឹក្សាកីឡាអូឡាំពិកអាស៊ី លើកទី៤១ ដែលកម្ពុជាធ្វើម្ចាស់ផ្ទះផងដែរ។

ព្រឹត្តិការណ៍នេះរៀបចំឡើងមិនត្រឹមតែអបអរសាទរដំណើរឆ្ពោះទៅព្រឹត្តិការណ៍ 19th Asian Games Hangzhou 2022 នៅប្រទេសចិន និងមហាសន្និបាតក្រុមប្រឹក្សាកីឡាអូឡាំពិកអាស៊ី លើកទី៤១ ដែលកម្ពុជាធ្វើម្ចាស់ផ្ទះ នោះទេក៍ជាការរត់ដើម្បីទីក្រុងបែតង មិត្តភាព សុខភាព ទំនាក់ទំនងល្អ និង ផ្ដល់ឱកាសអោយប្រជាពលរដ្ឋគ្រប់វ័យ បានចូលរួមលេងកំសាន្ត និងស្វែងយល់ពីតម្លៃកីឡា ក៍ដូចជាការបង្កើតនៅភាពស្និតស្នាលរវាងបងប្អូន មិត្តភ័ក្រ្ត និងមិត្តរួមការងារតាមរយៈការលេងកីឡាផងដែរ។ សម្រាប់វិញ្ញាសារប្រកួតវិញមាន រត់៣គីឡូម៉ែត្រ និងរត់៥គីឡូម៉ែត្រ ៕