ប្រពន្ធលោកផ្កាយ២ចង់ប្តឹងបកវិញ ក្រោយរឿងប្តីបោកលុយ២លានដុល្លាររត់ការចូលសញ្ចាតិបែកធ្លាយ,តែលោក ផែង វណ្ណៈ បោះសម្តីថា អាចសាកបាន..!

ប្រភពពីមន្ត្រីក្រសួងមហាផ្ទៃ បានបង្ហេីបអោយដឹងថា នៅព្រឹកថ្ងៃទី ៣០ ខែ តុលា ឆ្នាំ ២០២៥ លោកឧត្ដមសេនីយ៍ទោ គង់ វុទ្ធី អគ្គនាយករង នៃ អគ្គនាយកដ្ឋានអត្តសញ្ញាណកម្ម បានចូលខ្លួនបំភ្លឺដល់ក្រុមប្រឹក្សាវិន័យ នៃ អគ្គនាយកដ្ឋានអត្តសញ្ញាណកម្ម ពាក់ព័ន្ធករណីយកលុយជនរងគ្រោះ ២លានដុល្លារ ដេីម្បីរត់ការការងារមិនបានសម្រេចមិនប្រគល់លុយជូនជនរងគ្រោះវិញ ។

លោកឧត្ដមសេនីយ៍ទោ គង់ វុទ្ធី បានបដិសេដមិនបានឆបោកជនរងគ្រោះដូចសារព័ត៌មានផ្សាយទេ តែបានទទួលស្គាល់ថានៅខ្វះលុយជនរងគ្រោះប្រមាណ ២លានដុល្លារពិតប្រាកដមែន ។ ជនរងគ្រោះនឹងចូលបំភ្លឺនៅ អគ្គនាយកដ្ឋានអត្តសញ្ញាណកម្មនៅព្រឹកស្អែកដោយយកឯកសារជាភស្តុតាងទៅជាមួយផង ។

ប្រភពដដែលបានអោយដឹងទៀតថា នៅរសៀលថ្ងៃទី ៣០ ខែ តុលា ឆ្នាំ ២០២៥ នេះ អគ្គាធិការដ្ឋាន ក្រសួងមហាផ្ទៃ ក៏បានអញ្ជេីញលោកឧត្ដមសេនីយ៍ទោ គង់ វុទ្ធី ទៅបំភ្លឺផងដែរ ។

ដោយឡែក ប្រពន្ធរបស់លោកឧត្ដមសេនីយ៍ទោ គង់ វុទ្ធី ឈ្មោះ លោកស្រី ពេជ្រ ពិសី Pich Pisey បានបង្ហោះសារនៅលេីបណ្ដាញសង្គមហ្វេសប៊ុករបស់លោកស្រី ដោយបញ្ជាក់ខ្លឹមសារថា ” លោកផុសបំផុលរឿងមិនពិតលោកនឹងជួបមេធាវីចុះធ្វេីការតាមនិតិវិធី ” ។

លោក ផែង វណ្ណៈ បានតបវិញដោយបង្ហោះសារថា “យី សុទ្ធតែធ្វេីការតាមនិតិវិធី ? និតិវិធីណា បង្រៀនប្ដីលោកស្រីអោយដេីរបោកប្រាស់គេ ? យកលុយញេីសឈាមគេទៅចាយហាយសូរ ស្មានតែរួចពីសំណាញ់ច្បាប់មែន ? ចង់ប្ដឹង ប្ដឹងមក ខ្ញុំកំដរលោកស្រីដល់ទីបញ្ចប់ ។ ប្រឹងរកលុយសងជនរងគ្រោះទៅលោកស្រី កុំចំណាយពេលប្ដឹងអ្នកកាសែត ក្រដាស់មិនអាចខ្ចប់ភ្លេីងបានទេ”។

អគ្គនាយកដ្ឋានអត្តសញ្ញាណកម្ម សូមថ្លែងអំណរគុណចំពោះសារព័ត៌មាន PVN News ដែលបានលើកឡើងអំពីករណី ឯកឧត្តម ឧត្តមសេនីយ៍ទោ គង់ វុទ្ធី អគ្គនាយករង នៃអគ្គនាយកដ្ឋានអត្តសញ្ញាណកម្ម ថាបានទទួលប្រាក់រត់ការចូលសញ្ចាតិឱ្យជនបរទេសមិនបានសម្រេច ហើយមិនព្រមប្រគល់ប្រាក់ជូនជនរងគ្រោះវិញ។

អគ្គនាយកដ្ឋានអត្តសញ្ញាណកម្ម សូមជម្រាបដល់បងប្អូនប្រជាពលរដ្ឋ និងសាធារណមតិឱ្យបានជ្រាបថា ក្រុមប្រឹក្សាវិន័យរបស់អគ្គនាយកដ្ឋានអត្តសញ្ញាណកម្ម បានចាត់វិធានការកោះហៅសាមីខ្លួនដើម្បីបំភ្លឺ និងកំពុងបន្តស្រាវជ្រាវ ស៊ើបបញ្ជាក់បន្ថែមលើព័ត៌មានខាងលើ។

ករណីរកឃើញថា មន្ត្រី ឬថ្នាក់ដឹកនាំណាម្នាក់បានប្រព្រឹត្តកំហុសផ្ទុយនឹងវិន័យរបស់កងកម្លាំងនគរបាលជាតិ អគ្គនាយកដ្ឋានអត្តសញ្ញាណកម្មនឹងចាត់វិធានការអនុវត្តវិន័យលើបុគ្គលរូបនោះយ៉ាងម៉ឺងម៉ាត់។

ទន្ទឹមនេះ អគ្គនាយកដ្ឋានអត្តសញ្ញាណកម្ម សូមស្នើដល់បុគ្គលដែលមានការពាក់ព័ន្ធ ឬជាជនរងគ្រោះ សូមសហការផ្តល់ព័ត៌មាន ក៏ដូចជាឯកសារភស្តុតាងបន្ថែមប្រសិនបើមាន មកនាយកដ្ឋានរដ្ឋបាលសរុប នៃអគ្គនាយកដ្ឋានអត្តសញ្ញាណកម្ម រៀងរាល់ម៉ោងធ្វើការ៕